Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin M.Ş.Vazeh adına Mərkəzi Kitabxanasında 2 aprel – Beynəlxalq Uşaq Kitabı Günü ilə əlaqədar Danimarka yazıçısı, uşaqların sevimlisi Hans Xristian Andersenin 220 illik yubileyinə və uşaq şairi, M.Ş.Vazeh adına Mərkəzi Kitabxananın Fəxri oxucusu Simax Şeydanın xatirəsinə həsr olunmuş videoçarxlar hazırlandı.
“Hans Xristian Andersen – 220” adlı videoçarxda H.X.Andersenin həyat və yaradıcılığından bəhs olunur. Qeyd olunur ki, Andersen bütün dünyada nağıllarına görə tanınır. Videoçarxda yazıçının xatirəsinin əbədiləşdirilməsi haqqında da məlumat verilir.
“Uşaq şairi Simax Şeydanı anaraq” adlı videoçarxda bildirilir ki, şair Simax Şeyda əsərlərini Azərbaycan dilində yazıb. O, Nizami Gəncəvidən başlayaraq 75 azərbaycanlı şairin şeirlərini dağ yəhudilərinin dilinə tərcümə edib. Onun tərcümələri Amerika və Kanadada nəşr olunub. Simax Şeydanın şeirlərində Vətənə məhəbbətdən, Azərbaycan Respublikasının Prezidenti İlham Əliyevin Vətənə bağlılığından, Birinci vitse-prezident Mehriban Əliyevanın körpələrə diqqət və qayğısından, əməyin insanlara xeyrindən, böyüklərə hörmətdən, kiçiklərə qayğı göstərməkdən bəhs olunmuşdur.
Beynəlxalq Uşaq Kitabı Günü ilə əlaqədar “Kreativ” Uşaq İnkişaf Mərkəzində “Ucadan oxu” da təşkil olundu. Uşaq şöbəsinin müdiri Sevil Namazova çıxışında uşaq ədəbiyyatı gününün məhz bu tarixə təsadüf etməsinin məşhur danimarkalı nağılçı Hans Xristian Andersenin 1805-ci il aprelin 2-də anadan olması ilə bağlı olduğunu bildirdi. Böyük metodist İradə Hüseynova bildirdi ki, Beynəlxalq Uşaq Kitabı Gününün qeyd olunmasında məqsəd cəmiyyətin diqqətini uşaq ədəbiyyatına, onun problemlərinə cəlb etməkdir.
Kitabxana əməkdaşları uşaqlar üçün H.X.Andersenin “Çirkin ördək balası” nağılını oxudular. Uşaqlara mərhum şair Simax Şeydanın yaradıcılığından da məlumat verildi. Balalarımızın sevimli şairi Simax Şeydanın “Ovçu ayı” nağılı oxundu.
“Kreativ” Uşaq İnkişaf Mərkəzinin direktoru Natəvan Quliyeva kitabxana kollektivinə əməkdaşlığa görə təşəkkürünü bildirdi. Uşaqlara hədiyyələr və kitablar təqdim olundu.
Videoçarxlar kitabxananın YouTube kanalında izləyicilərə təqdim olunur:
https://www.youtube.com/watch?v=xYRvDt1EkYE
https://www.youtube.com/watch?v=sEWRqGdErY0&t=32s
