Azərbaycan Dillər Universitetinin (ADU) rektoru, akademik Kamal Abdulla Çili Respublikasının ölkəmizdəki müvəqqəti işlər vəkili Fidel Coloma Grimberglə görüşüb.
SÜLH.İNFO.az xəbər verir ki, rektor diplomatı rəhbərlik etdiyi ali təhsil ocağında görməkdən məmnun olduğunu bildirib:
“Biz sizinlə əməkdaşlığa, Çili mədəniyyəti ilə, ədəbiyyatı ilə daha dərindən tanış olmağa hazırıq. Arzu edərdik ki, Çili universitetlərinin biri ilə ciddi əməkdaşlığımız başlasın. İnanıram ki, bizim sıx əlaqələrimiz yaransa, Çilidə ictimaiyyətin Azərbaycan haqqında təsəvvürləri daha da dolğunlaşacaq, eyni zamanda Azərbaycanda Çili haqqında təsəvvürlər genişlənəcək. Bu isə bizim ispandilli ölkələrlə əlaqələrimizin bütöv və dolğun olmasına gətirib çıxaracaq. Çili olmadan bu bütövlüyü təmin etmək mümkün olmayacaq. Qarşılıqlı əlaqələrin qurulması hər iki ölkənin mədəniyyətinin öyrənilməsində, araşdırılmasında müstəsna rol oynayacaq.”
Rektor daha sonra ADU-da fəaliyyət göstərən dil və mədəniyyət mərkəzləri haqqında məlumat verib, qonağı universitetin “Səfir saatı” layihəsində tələbələrlə görüşə dəvət edib.
Çili Respublikasının ölkəmizdəki müvəqqəti işlər vəkili Fidel Coloma Grimberg ADU-nun Çilidə xarici dillərin tədrisini həyata keçirən universitetlərdən biri ilə sıx əməkdaşlığının qurulmasının zəruriliyinə diqqət çəkib. Diplomat qeyd edib ki, bunun üçün təşəbbüslə çıxış edəcək, danışıqlar aparacaq: “İnanıram ki, əlaqələrimizin qurulması və inkişaf etdirilməsi tədricən öz müsbət nəticəsini verəcək. Müəllim-tələbə mübadiləsinin aparılması, elmi konfransların təşkil olunması və dil öyrənmə bacarıqlarının əldə olunması əməkdaşlığımız üçün yeni perspektivlər yaradacaq.”
Görüş qarşılıqlı əlaqələr və əməkdaşlıq münasibətlərinin imkanlarının müzakirəsi ilə davam edib.
