Türkiyə iqtisadiyyatında ciddi problemlər yaşanır, lirə sürətlə dəyərdən düşür, qiymətlər qalxır. Mövcud vəziyyət Türkiyə vətəndaşlarını narahat edir.
SÜLH.İNFO.az axar.az-a istinadən xəbər verir ki, bu sözləri politoloq Elxan Şahinoğlu qeyd edib.
O bildirib ki, bəzi şəhərlərdə lirənin ucuzlaşmasına etirazlar da qeydə alınıb:
“Elə buna görə də “Türkiyədə erkən seçkilər keçirilə bilərmi” sualı aktuallaşıb. Türkiyə Cümhurbaşqanı Rəcəb Təyyub Ərdoğan qətiyyətlə erkən seçki keçirilməyəcəyini bildirdi. Hakim partiyanın reytinqinin azalması fonunda erkən seçki AKP-nin maraqlarına uyğun deyil. Rəcəb Təyyub Ərdoğan Cümhuriyyətin yüz illiyinə - 2023-cü ilə qədər istefa verməyəcək, o, həmin tarixdə böyük meqa-layihələrin işə düşməsinə rəhbərlik etmək istəyir”.
Politoloq bu proseslər fonunda Azərbaycandakı narahatlığa da toxunub:
“Azərbaycanda bu proseslər bir sualı aktuallaşdırıb: Türkiyədə Ərdoğanın yerinə bir başqası Cümhurbaşqanı seçilərsə, bunun Türkiyə-Azərbaycan münasibətlərinə təsiri necə olacaq?
Əlbəttə, Ərdoğanın Türkiyə-Azərbaycan siyasi və hərbi ittifaqının güclənməsi üçün gördüyü işlər danılmazdır. Azərbaycanın İkinci Qarabağ müharibəsində qələbəsində Ərdoğanın dəstəyini inkar etmək də mümkün deyil. Misal üçün Türkiyədə hakimiyyətdə başqası olsaydı, Azərbaycan eyni dəstəyi almaya da bilərdi. Ancaq bu o demək deyil ki, Ərdoğandan sonra Türkiyə-Azərbaycan siyasi və hərbi ittifaqı zəifləyəcək. Ərdoğanın səyi ilə bu ittifaq elə bir şəkil alıb ki, onun yerinə gələn bu siyasəti davam etdirməli olacaq, “Şuşa Bəyannaməsi”nə uyğun siyasət yürüdəcək.
Digər tərəfdən Türkiyə ilə Azərbaycanın hərbi və müdafiə sistemləri xeyli inteqrasiya olunub. Türkiyədə növbəti Cümhurbaşqanı bu amili də nəzərə almaq məcburiyyətində qalacaq. Ona görə də Ərdoğan sonrası Türkiyə-Azərbaycan münasibətlərinin gələcəyi barədə narahat olmağa dəyməz”.
