Fələstinin "HƏMAS" qruplaşmasının yaraqlı qanadı olan İzzəddin əl-Qəssam Tuğaylarının ötən gün girovluqdan azad etdiyi iki nəfərin görüntüsü yayılıb.
Azad edilən Nurit İtsxak 79, Yoxved Lifşits isə 85 yaşındadır.
Girovların yayılan fotolarında "HƏMAS" üzvlərinin onların əlindən tutaraq yeriməyə kömək etdiyi əks olunub. Kadrlarda yaraqlıların girovlara yemək təklif etdiyi görüntülər də yer alıb.
"HƏMAS" Misir və Qətərin vasitəçiliyi iki nəfərin azad etdiyini açıqlayıb. Bildirilir ki, Nurit İtsxak və Yoxved Lifşits humanitar səbəblərə görə azad ediliblər.
Xatırladaq ki, "HƏMAS" bundan əvvəl amerikalı Judith Raananla qızı Natali Raananı da azad edib. Qəssam Tuğayları sözçüsü Ebu Ubeyde Qətərin səylərinə cavab olaraq “humanitar səbəblərdən” iki ABŞ vətəndaşını azad etdiklərini bildirib.
Məlumat üçün bildirək ki, "HƏMAS" sözçüsü daha öncəki açıqlamasında əllərində 200-250 girov olduğunu qeyd etmişdi.
Qeyd edək ki, oktyabrın 7-də HƏMAS İsrailə bir neçə min raket atıb. Bunun fonunda İsrailin milli təhlükəsizlik naziri İtamar Ben-Qvir həmin gün ölkədə fövqəladə vəziyyət elan edib. İsrailin Baş naziri Benyamin Netanyahu ölkənin müharibə vəziyyətində olduğunu bəyan edib.
