Kredit götürmək istəyən Bakı sakini aldadılıb.
SÜLH.İNFO.az xəbər verir ki, paytaxtın Biləcəri qəsəbəsində yaşayan Sirac Mirzəzadə bir neçə gün bundan əvvəl kredit götürmək üçün instaqramda tanınmış banklardan birinə aid olduğunu düşündüyü səhifəyə müraciət edib.
Sirac Mirzəzadənin sözlərinə görə, ona vəd edilən 1500 manat dəyərində olan kredit kartı həmin gün çatdırılmayıb, dəfələrlə səhifədə qeyd olunan nömrə ilə əlaqə saxlamağa çalışsa da, bu mümkün olmayıb. Zərərçəkmiş məsələ ilə bağlı ərazi üzrə polis bölməsinə müraciət edib.
Biz də səhifədə göstərilən nömrə ilə əlaqə saxlamağa çalışsaq da, nömrəyə zəng çatmadı. Adına səhifə açıldığı iddia edilən bankdan bildirdilər ki, həmin profil onlara məxsus deyil, yəni saxtadır.
Kibertəhlükəsizlik üzrə ekspert Ceyhun Cəfərov qeyd edib ki, hazırda fırıldaqçılar oxşar üsullarından istifadə edərək müştərilərin məxfi məlumatlarını və vəsaitlərini mənimsəməyə çalışırlar.
Ekspert əlavə edib ki, bu cür hallarla qarşılaşan vətəndaşlar mütləq hüquq-mühafizə orqanlarına məlumat verməlidirlər.
