“Azərbaycan Hava Yolları” QSC (AZAL) Səudiyyə Ərəbistanının Ciddə şəhərinə xüsusi reyslərin həyata keçirilməsinə başlayır.
SÜLH.İNFO.az bu barədə AZAL-ın Mətbuat xidməti məlumat yayıb.
Məlumata görə, uçuşlar noyabrın 25-dən həftədə bir dəfə, cümə axşamı günləri "Airbus A319/320" təyyarələri ilə yerinə yetirəcək.
Aviabilet satışı aviaşirkətlərin rəsmi saytında, həmçinin aviadaşıyıcıların akkreditə olunmuş agentliklərində həyata keçirilir.
Reyslərə yalnız COVİD-19 pandemiyası ilə əlaqədar tətbiq edilən mövcud məhdudiyyətlər şəraitində uçuş icazəsi olan sərnişinlər kateqoriyası qəbul olunacaq.
Səudiyyə Ərəbistanına səyahəti planlaşdıran Azərbaycan vətəndaşları bu ölkə ərazisinə giriş hüququna malik olmalıdırlar. Pandemiya dövründə Səudiyyə Ərəbistanına giriş qaydaları aviaşirkətin saytında qeyd edilmişdir.
Azərbaycanda COVİD-19 testindən keçmək üçün klinikaların siyahısı aviaşirkətin rəsmi saytında dərc edilib.
Səudiyyə Ərəbistanının şəhərlərindən Azərbaycana uçuş zamanı COVİD-19 testini dövlət tərəfindən akkreditə olunmuş və PCR testi vasitəsilə analiz götürən istənilən klinikada və ya laboratoriyada keçmək mümkündür. Arayışda onun həqiqiliyini təsdiq edən QR-kodun olması tövsiyə olunur. QR-kod hava limanında rəsmiləşdirmə prosedurlarından keçidi sürətləndirməyə imkan yaradacaq.
COVİD-19 testinin nəticələri uçuşdan əvvəl 72 saat ərzində etibarlı olmalıdır.
